طب وبعدين !!

السلام عليكم ورحمة الله وبركاته
ازيكم يا جماعه , عاملين ايه وايه اخبار مدوناتكو
عايزة اتكلم معاكو في موضوع كدا ...
هو يمكن معقد شويه , بس ياريت ندردش فيه وان شاء الله نستفيد
------------------
لما انت تعمل موقف , واللي قدامك يفهمك غلط
تبقه دي غلطة مين ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
؟؟؟؟؟؟؟؟؟؟؟؟؟؟؟؟
؟؟؟؟؟؟؟؟؟؟؟؟؟؟؟؟؟؟؟؟؟؟؟؟
انت ولا هو ؟؟؟
في الأول , عايزة اتفق معاكو على حاجه
ان اي حد بيشوف الدنيا كلها بعنيه هو
مش بيشوف الدنيا على حقيقتها
وعليه , يبقه اي حاجه بتحصل في حياتنا
بنفهمها تبعا لشخصيتنا وخبراتنا احنا
وليس كما هو الأمر في الواقع
--------------
لما انت تعمل حاجه كويسه واللي قدامك يفسرها غلط
ويتعامل معاك على اساس الفكرة اللي هو كونها عنك
من دماغه
يبقه ايه الحل ساعتها !!!
هتقولي هشرح وجهة نظري وافهمه غلطه
طب كل مرة هنعمل كدا ؟؟
وهو انا كل المرات بعرف ان اللي قدامي فاهم غلط ؟؟
ومش هي دي المشكله اللي بتكلم فيها
عايزين حل لطريقه التفكير دي اصلا
هو عنده وجهة نظر عني انا , وهو اللي حاططها
هل هو ليه الحق ده اصلا ؟ انه هو يفكر فيا ويشوفني
زي ماهو عايز , ولا المفروض يشوفني زي ماانا ؟؟
حد عنده حل ؟

النرفزه والحقيقه !!!!!!!

السلام عليكم ورحمة الله وبركاته

اهلا بيكو مرة تانيه وحابه اناقش معاكو موضوع محير جديد D:

النرفزه , والحقيقه !!!

كلنا بنتنرفز , ويمكن في كتير مننا عصبيين

ولما الواحد بيتعصب بيطلع منه كلام مش حلو , وممكن يزعل اللي قدامو جامد

دي اول نقطه

تاني نقطه , لما بيحصل كدا بقه , هل بيبقه ده حقيقيتنا من جوه

يعني يقولك الواحد بيبان على حقيقته لما يتنرفز , تعرف هو بيحبك وبيخاف على زعلك واقصد الزعل الجامد

ولا لأ , ومؤدب ولا لأ S:

وهي دي النقطه اللي محيراني , يعني هل الكلام ده صحيح ؟؟

احنا بنبان على حقيقتنا وقت نرفزتنا ؟؟

النقطه التالته بقه , هل الواحد مفروض يكون مسؤول عن افعاله وهو متعصب

يعني اقصد المفروض اننا منغلطش في اللحظه دي يعني ؟؟

ولا ايه ؟؟!!!!!!!!

هو طبعا النبي صلى الله عليه وسلم وصى بألا نغضب

واللي مترفز لو كان واقف يقعد , ولو كان قاعد يتكئ , او يقوم يتوضي ويصلي ركعتين عشان يهدى

بس مين بقه بيفتكر يعمل الكلام ده وهو شايط D:

نغلط ونعتذر ونغلط ونعتذر

ونغلط ونعتذر واهي ماشيه

ربنا يخلي لنا الحبايب والقلوب البيضا D:

احكو لي كدا بتعملو ايه لما تتنرفزو , وازاي بتهدو

وبتغلطو كتير ولا بتعرفو تمسكو اعصابكو

خلونا نتكلم

اتكلم براحتك

D:

الكارتون زمان , ودلوقتي !!

السلام عليكم ورحمة الله وبركاته

الموضوع باين من عنوانه

في مرة كنت قعده بفتكر مسلسلات الكارتون اللي كنت بشوفها وانا صغيره

وقعدت اقارن بينها وبين مسلسلات دلوقتي , لقيت انه الكارتون النهارده معقد أوي للأطفال

وكله عنف وحروب وغير كدا كمان , متحسش ان للأطفال اصلا

يعني هديكو أمثلة , كان في كارتون زمان كنت بحبه اوي , قصته ان فيه 3 اصحاب

كل يوم يتقابلو ويفكرو هنلعب ايه النهارده , هو ده كل المسلسل وكان هادي موت

وبجد طفولي يعني , وافكار تانيه كتير جميله وبسيطه زي توم اند جيري مثلا

وميكي ماوس والحاجات دي , دلوقتي بقه كلها صراعات وتعقيد

بجد ربنا يستر ع الأجيال اللي جايه , الله يكون في عونهم

وانتو بقه رأيكو ايه ؟؟

في حلـــــــمي

في الحلم بشوف حاجات بتحصل , حاجات غريبه , واصحى اقول هو إيه دا !!!
هما بيعملو كدا ليه ؟؟..
وابقه مش فهمه الحلم خالص , بس النهارده اكتشفت حاجه جديده
وهي إنه الأحلام اللي بنحلمها هي عبارة عن تصوير للأفكار اللي في عقلنا الباطن
يمكن الأفكار دي العقل الواعي مبيبقاش شايفها
بس بجد الأحلام بتخليني افهم نفسي أكتر من جوايا
وتكشف لي الحقايق العميقه اللي مش بقدر أشوفها غير في حلـــــــمي ....
ودمتم

Acting like you're somebody else gets me frustrated

كل واحد فينا ليه شخصيته , وليه روحه , اللي بتميزه عن أي حد تاني في الدنيا كلها
بس سعات بنلبس حاجه زي قناع عشان نسترضي اللي قدامنا او عشان خايفين منهم
وساعتها أنا مببقاش نفسي , ببقه حد تاني عشان حد تاني !!

طب ليه أنا اعمل كدا ؟ ليه أبقه منافق ومااكونش صادق وأبيض .

انا لا أؤيد الناس المتكلفه , المزيفة ولا أؤيد التصنع , لازم نكون كلنا صريحين وصادقين ونكون نفسنا طول الوقت .

انت شخص جميل وروحك مميزة , ومفيش حد زيك في الدنيا ....

honesty , promise me I'm never gonna find you fake it

no no no

موكا

السلام عليكم ورحمة الله وبركاته
ازيكم جميعا , اهلا بيكو في مدونتي الجديده , اللي اتمنى اتعرف من خلالها على اراء مفيدة
واكون صداقات ناجحه ان شاء الله , ولو تسمحو لي احب اعرف عن نفسي بشوية تفاصيل عشان تعرفوني اكتر
انا موكا , طالبه في سنه تانيه كلية الحاسبات والمعلومات جامعة عين شمس
عندي 20 سنه , وعايشه في مصر
بحب المزيكا والبرمجه والشيكولاته والبيبسي
بحب العب كرة الطائرة اوي , وبحب اللون الأزرق كمان جدا
هوايتي المفضله هي القراءه والتنظيم والبحث
مممم
انا مكنتش عايزة اعمل مدونه لاني مش بكتب كتير
يمكن بس مذكرات كدا لنفسي بس
لكن النهارده حسيت بكلام جوايا وطلعته ع الورق
وكنت حابه اخد رأي ناس كتير في الكلام ده
عشان كدا قررت في ساعتها اني اعمل مدونه
وان شاء الله استفيد وأفيد
اهلا بيكو مرة تانيه
تقبلوني بينكم